Admin Admin
عدد المساهمات : 261 تاريخ التسجيل : 13/10/2011 الموقع : منتديات شخبط
| موضوع: ليه ما نسيبش الخلق للخالق ؟ الجمعة أكتوبر 21, 2011 1:57 pm | |
| سمعت جملة فى فيلم بتقول : " كل الناس بتدخل فى حياة كل الناس بطريقة تدايق كل الناس " ده اللى بيحصل فعلاً .. خصوصــــــًا مع البنــات ..
تعالوا نتأكد وشوفوا إيه اللى بيحصل للبنات من الناس وإيه اللى بتسمعه فى كل مواقف حياتها :
- البنت اتخرجت من الجامعة وما اشتغلتش : ** هو انتى هتفضلى قاعدة فى البيت كده ؟.. هما أهلك صرفوا عليكى وعلموكى عشان تقعدى فى البيت ؟ .. لازم تحققى ذاتك وشخصيتك .. وبعدين لازم تخرجى وتتعرفى على ناس .. ده اسمه كلام ؟!!
- البنت اتخرجت واشتغلت : ** هو انتى غاوية تعب قلب ؟ .. إيه اللى يشغلك ؟ .. هما أهلك مانعين عنك حاجة ؟ .. وبعدين البنات دلوقتى اللى بتشتغل بقت أكتر من الرجالة .. هو الشباب لاقى شغل والا عارف يتجوز والا يعمل حاجة .. البنت مكانها بيت ابوها واما تتجوز يبقى بيت جوزها .. بلا مساواة بلا إثبات ذات .. الواحدة تثبت ذاتها فى بيتها ..
- البنت بتخرج وبتمارس حياتها بشكل طبيعى وفى حدود الأدب : ** مالك داخلة خارجة ع الفاضى والمليان ؟ .. كده الناس هتاخد عنك فكرة وحشة .. ولو واحد اتقدملك وعرف انك بتخرجى كتير كده ومش راكزة فى البيت هيطفش .. لأ لأ كده ما يصحش أبدًا .. يابنتى اقعدى فى البيت شوية وقللى خروجك ..
- البنت بتحب البيت وبتخرج بس للضرورة : ** إيه ده هو انتى هتفضلى حابسة نفسك بين أربع حيطان ؟ .. يابنتى انتى لسه صغيرة .. بكرة تتجوزى وتخلفى وغصب عنك تتحبسى فى البيت .. وبعدين تعالى هنا هو انتى هتتجوزى ازاى وانتى ما بتخرجيش ولا بتتشافى ؟!.. قومى قومى اخرجى واتفسحى زى البنات اللى فى سنك ..
- البنت اتجوزت بدرى : ** إيه اللى رماكى على الهم بدرى ؟! .. هم أهلك كانوا اشتكولك يا بنتى والا مش عارفين يصرفوا عليكى ؟ .. يابنتى كنتى استنى تجيلك فرصة أحسن .. وكنتى تتمتعى بحياتك .. عينى عليكى ..
- البنت اتأخرت شوية فى الجواز : ** آدى أخرة البطر .. يابنتى هتفضلى مستنية ييجى اللى فى بالك .. إنتى عاوزة واحد تفصيل مش هتلاقيه .. اقبلى بأى جوازة أهو يبقى اسمك اتجوزتى .. ** وياسلام لو فى فرح واحدة قريبتها والا صاحبتها : يا حبيبتى بكرة ربنا يعوضك ويبعتلك اللى يستهلك .. والنبى انتى زى القمر بس الرجالة عميوا .. ( المهم ينكدوا عليها ) ** ولو سرحت شوية : دى غيرانة .. ماهى قريبتها دى اصغر منها .. بس هى اللى طالعة فيها وعملت كده فى نفسها .. ياللا .. احنا عندنا بنات برضو ... ربنا يسهل لعباده ..
_ وأول ما تتجوز : ** ها .. مافيش أخبار .. مش هنفرح بابنك والا بنتك ؟! .. روحى اطمنى على نفسك .. ما تستنيش .. ( ويبدأ الزن )
- بعد أول مولود : ** مش ناوية تجيبيله أخت والا أخ .. يتربوا كده مع بعض .. ما تسمعيش كلام الدكاتبرة اللى بيقولوا ريحى .. ده كلام فاضى ..
_ ولو جابت بنات : ** اجدعنى كده وهاتى الولد لجوزك .. ماتصدقيش انه مش هامه .. تلاقيه بس مش عاوز يزعلك وهيموت ع الولد عشان يحمل اسمه ويبقى سنده .. ( نسيوا ان ارادة ربنا هى الغالبة )
_ ولو جابت ولاد : ** ياللا بقى هاتى البنت .. دى البنت حبيبة أمها .. وهى اللى هتبقالك .. بكرة الولد يتجوز ويروح لمراته .. إنما البنت بتفضل فى حضن أمها .. دى البنات حنينة .. اجدعنى ياللا ..
لو قلت حاجة غير اللى بيحصل قولولى .. وعندى سؤال : ليه الناس بتشغل نفسها زيادة عن اللزوم بغيرها ؟ ليه ما نسيبش الخلق للخالق ؟
| |
|